Юм юмны зах зухаас

How to change default keyboard layout using Ubuntu Live CD

2009-10-08T02:51:00.000-07:00

Өөртөө нэг бус удаа тохиолдсон нэгэн гайхалтай асуудлын шийдлийг бичье гэж бодлоо. Хэдэн сарын өмнө Jaunty -г гараад удаагүй байхад нь суулгаад гарын тохиргоон дээр нь Монгол хэл нэмсэн юм. Тэр үед туршлагагүйтэж анхдагч хэл болон хэл солих товчлуурыг тохируулаагүй орхисноос болж Jaunty руугаа нэвтрэх боломжгүй болж байлаа. Учир нь систем асах үед анхдагч хэл нь монгол болчихоод хэрэглэгчийн нэр, нууц үгээ оруулах боломжгүй болсон гэсэн үг.
Энэ асуудлыг тухайн үед шийдэх гэж нилээд оролдсон боловч амжилтыг эс олсон юм. Асуудлыг хамгийн муу арга болох дахин суулгах замаар шийдэж байж билээ. Харин өчигдөрхөн энэ асуудал надад тохиолдов. Гэхдээ энэ удаа миний тооцоолуур биш найзын маань тооцоолуур нэвтрэх аргагүй боллоо шүү дээ. Би гэдэг хүн чинь арвин их туршлагатай хүн болж хувираад засахаар ханцуй шамлан орлоо.
Шийдлийг ч тун амархан олсон. Асуудлаа ч шийдэж чадлаа. Өөр хэн нэгэнд ийм асуудал тохиолдож магад гэж бодоод шийдлийг нь бичиж байна:
1. Live CD-гээ ажиллуулна.
2. Терминал дээрээс gksudo nautilus командыг ажиллуулна.
3. Файл хөтөч дээрээс Ubuntu суусан дискээ олоод ороорой. File System рүү орохгүй. Энэ нь таны ажиллаж байгаа Live CD-ний файл систем юм шүү.
Энэхүү үйлдэл нь ердөө л дискээ моунт хийж байгаатай адил юм. Хэрвээ та терминал дээрээс ямар диск залгаатай байгааг, олоод моунт хийж чаддаг бол шууд тэр аргыг хэрэглэх нь илүү амар.
4. Диск рүү орсныхоо дараа /etc/default/console-setup файлыг нээнэ.
5. Уг файл дээр дараах өөрчлөлтийг хийгээрэй:

# The following variables describe your keyboard and can have the same
# values as the XkbModel, XkbLayout, XkbVariant and XkbOptions options
# in /etc/X11/xorg.conf.
XKBMODEL="pc105"
XKBLAYOUT="mn"
XKBVARIANT=""
XKBOPTIONS=""

Энд байгаа "mn" -ийг "us" болгож засна. Хэрвээ засвар хийгээд хадгалахад эрх хүрэхгүй байна гэсэн алдаа гарвал терминал дээрээс уг файлыг нээгээд засварлаарай.

Зиак засвар хийж дууссаны дараа системийг хатуу дискнээсээ дахин ачааллахад анхдагч хэл нь англи болсон байна.
Убунтуг анхлан суулгаж байгаа хүмүүс гарны тохиргоон дээр Монгол хэл нэмэх гэж байгаа бол анхдагч буюу default хэл нь заавал англи байх ёстой гэдгийг битгий мартаарай.

Цуврал 1-5. Густав Климт

2009-09-30T02:06:00.000-07:00

Климт 1862 онд Венид Моравиан гаралтай нийгмийн дунд ангийн нэгэн гэр бүлд мэндэлсэн. Түүний эцэг Эрнст Климт сийлбэрчин, алтны дархан нэгэн байсан бөгөөд тун бага хэмжээний мөнгө олдог байв. Зураачийн хүүхэд нас ядуу зүдүү амьдралын дунд өнгөрчээ. Тэрээр өөрийн амьдралынхаа туршид гэр бүлдээ санхүүгийн туслалцаа үзүүлэх хувь зохиолтой байлаа.

Дэлгэрэнгүйг Миний урлангаас

Disable Online User Notification in Pidgin

2009-09-27T20:04:00.000-07:00

Pidgin ашигладаг хүмүүст тохиолддог нэгэн асуудлын шийдлийг бичиж байна. Архагууд бүгдээрээ мэддэг биз ээ. Шинэхэн Линуксчдад харин тус болох болов уу. Асуудал нь юу вэ гэхээр:
Pidgin ажиллаж байхад хүмүүс орж гарах үед дэлгэцэн дээр доорх зурагт үзүүлсэнтэй адил мэдэгдэл гарч ирдэг. Мессенжерийнх нь листэнд цөөн хүн байдаг хүнд бол нэг их асуудал биш л дээ. Харин олон хүнийг жагсаасан хүнд заримдаа их төвөгтэй. Жишээ нь миний хувьд юм хийж байхад дэмий юм гарч ирээд анхаарал сарниулаад байдаг юм.
Дэлгэцний баруун дээд хэсэгт байгаа хар дэвсгэртэй зүйл өнөөх гайхал чинь шүү дээ. Энэ гайхал мэдэгдлийг дахиж гарч ирэхгүй болгох арга нь:

Tools цэсний Plugins хэсэг рүү орно. (Ctrl+U)
'Libnotify popups' сонгоод Configure plugin товчийг дарна уу.
'Buddy signs on' чагтыг авч хаяна :).

Зиа ингээд анхаарал сарниулаад байсан мэдэгдэл дахиж ирэхээ байлаа шүү дээ.

.NET programming in Ubuntu

2009-09-24T21:17:00.000-07:00

Миний бие Линукс системтэй танилцаад 6 жил, Убунтутай танилцаад 3 жил гарантай болж байгаа ухаантай. Гэтэл Линуксын нэгэн боломжийг огт мэдэлгүйгээр өнөөг хүрчээ. Тэр боломжийг олж мэдэнгүүтээ Убунтуд дурлаж байснаа бүр хайрлах шат руугаа орлоо шүү дээ. Миний олж мэдсэн, надаас бусад нь аль хэдүйн мэддэг байсан болов уу гэмээр энэ боломж намайг ёстой л алмайрууллаа даа.

Би бээр Моно гээч зүйлийг хальт энд тэндэхийн мэдээний гарчиг дээрээс харсан ч яаг юу болохыг сонирхож уншилгүй өдийг хүрсэн билээ. Ном уншаад сууж байсан чинь .NET-ийн програмууд зөвхөн Виндоус дээр бус ямар ч платформ дээр ажиллана. Мөн ямар ч платформ дээр дотНЭТийн програмыг хөгжүүлж болно гэж уншаад шууд л Гүүгл ахаас асуулаа. Тэгсэн өнөөх Моно-г чинь зааж өгдөг юм байна. Тэр дор нь суулгаад л эхний туршилтуудыг хийлээ. Үнэхээр сайхан санагдлаа.
дотНЭТ-ийн програм хүртэл хөгжүүлж болж байгаа юм чинь Убунту-д дутуу юм алга аа. Ёстой л "Би хайлж урсаж байна" хэ хэ.

Package Installation error and solution

2009-09-21T19:00:00.000-07:00

Зиа миний бие Karmic alpha 5 гарангуут нь суулгаад ашиглаж байгаа нэгэн билээ. Суулгасныхаа дараахан нь галт үнэг дээрээ флаш плагин суулгах гэсэн чинь алдаа гараад суулгаж чадаагүй. Гэтэл системээ шинэчлэх гэх мэт үйлдэл хийх гэхээр нөгөө муу дутуу суусан флашаас болоод алдаа заагаад явдаггүй ээ. Яаж шүү нэг юм засая даа гэж бодоод яваад л байснаас яг зав гаргаж оролдож чадалгүй өдийг хүрчээ.
Гарсан алдаа:

Remove package in bad state

The package 'adobe-flashplugin' is in an inconsitent state and needs to be reinstalled, but no archive can be found for it. Do you want to remove this package now to continue?

Энэ алдааг засах гэж олон аргаар үзлээ.

apt-get --reinstall install abobe-flashplugin

dpkg -P --force-all adobe-flashplugin

dpkg –-remove –-force-remove-reinstreq adobe-flashplugin

Эдгээрээс аль ч амжилтыг эс олов. Эцэст нь асуудлыг дараах байдлаар шийдлээ.

/var/lib/dpkg/info/ хавтсанд байгаа adobe-flashplugin-д холбогдох бүх файлыг устгана.
dpkg –еremove –-force-depends –-force-remove-reinstreq adobe-flashplugin

Үүний дараагаар системийн шинэчлэлт энэ тэр асуудалгүй ажиллаж байна шүү. Одоо дахиад флаш плагин суулгана даа.
Над шиг асуудалтай нэгэнд нь хэрэг болох болов уу гэж бодоод бичиж байна. Мэддэг нэгэнд нь ч ичмээр дамшиг даа :)

Цуврал 1-4. Илья Репин

2009-09-17T02:14:00.000-07:00

Та бүхэнд цувралаар хүргэж буй алдартай зураачдын намтрыг оросын алдарт зураач, хөрөг зургийн нэрт мастер Илья Репины намтраар үргэлжлүүлж байна.

Дэлгэрэнгүйг: Миний урлан-аас

Шинэ блог

2009-09-14T17:45:00.000-07:00

Энэ блог маань хэдий "Юм юмны зах зухаас" нэртэй боловч мэргэжлийн чиглэлийн зүйлс илүүтэй бичигдэж байгаа билээ. Мэдээллийн технологийн чиглэлийн мэдээнүүд дунд тэс хөндлөгийн урлагийн мэдээ, нийтлэлүүд байх нь ёстой л нөгөө тоон дотор үсэг цохиж явна уу даа гэдэг шиг юм болоод байгаа мэт санагдаад шинэ блог нээв. Шинээр нээгдсэн блогтоо зөвхөн урлагийн чиглэлийн мэдээ, мэдээлэл, нийтлэлүүд бичиж байх болно.

Хаяг: http://zaluxa.wordpress.com

“Би чамд хайртай” 25 жилийн дараа

2009-09-10T19:16:00.000-07:00

Монголчуудын дунд үе, залуучуудын бидний ч мөн адил хамгийн дуртай монгол киноны нэг нь маргахын аргагүй “Би чамд хайртай” кино билээ. Би хувьдаа уг киног монголын кино урлагийн сор бүтээлүүдийн нэг яах аргагүй мөн гэж боддог. Хэдэнтээ үзсэн ч уйдахааргүй сайхан кино шүү. Мэдээж уг кино хүн төрөлхтний мөнхийн сэдэв болох ХАЙР тэр дундаа АНХНЫ ХАЙРын тухай өгүүлдэг болохоор уйдах аргагүй байдаг биз ээ.
Энэ зунаас “Би чамд хайртай” киноны 2 дугаар ангийг 25 жилийн дараа хийх гэж байгаа гэж сонслоо. Хайран сайхан киног яйран болгоод хаячих вий гэсэн бодол төрж байсныг нуух юун. Нөгөө талаар монгол хүн бүрийн танил болсон, үзэх дуртай киног нь үргэлжлүүлэн хийх гэж байгаа киноны уран бүтээлчдийг ямар зоригтой хүмүүс вэ ч гэж бодогдож байлаа. Тиймдээ ч кино дэлгэцэнд гарангуут нь үзэх хүсэл төрсөн юм.
2009 оны 09 сарын 09-ний өдөр “Би чамд хайртайе-2” кино монгол орон даяар нээлтээ хийлээ. Над шиг хүсэн хүлээсэн, кино ямар болсыг, 25 жилийн өмнөх Үрлээ, Баяраа хоёр хир өөрчлөгдсөнийг харахыг хүссэн хүмүүс цөөнгүй байсан болов уу. Кино ч эхэллээ. Өөрөө хэдий ертөнцийн мөнх бусыг үзсэн ч “Би чамд хайртай” киноны дүрээрээ монголчуудын сэтгэл зүрхэнд өнөөг хүртэл амьд сэрүүн яваа Дэлгэрийн хүү Мэндээгийн дүрд дуучин Болд тогложээ. Харин Үрлээ, Баяраа хоёрын охины дүрд жүжигчин Ундрал тоглосон байна. Үнэхээр сайхан кино болжээ. Киног бүтээсэн жүжигчид, найруулагчид, зураглаачид бүгдээрээ л тун сайн ажилласан байна. Ёстой л үзэгчдийг гомдоохооргүй кино болжээ.
25 жилийн өмнө амьдралд анхлан хөл тавьж буй 18 насандаа тоглож байсан киноны гол дүрийн жүжигчдийг өнөөдөр дөчин насны босгыг давсан хойно нь дахин дэлгэцнээ харахад сайхан байлаа. Үрлээ, Баяраа, Туулайхүү гээд л. Яг л хэвээрээ. Гэхдээ тэдний дунд нэг хүн үгүйлэгдэж байсан нь яахын аргагүй Дэлгэр байв. Тэрээр амьд сэрүүн байсан бол гэсэн бодол өөрийн эрхгүй төрж байлаа. Алтан үеийн хэмээгдэх жүжигчдээс ардын жүжигжин Очирбат, Дамчаа, Жарантав нар тоглосон нь киног аргагүй л чимж байсан гэхэд буруудахгүй биз ээ. Түүнчлэн уг кино нь ардын жүжигчин Дамчаа гуайн тоглосон хамгийн сүүлчийн дэлгэцийн уран бүтээл ажээ.
Танхимд суугаа хүмүүсийг тэсэлгүй инээлгэх хөгжилтэй агшнууд, хүн бүрд нэгийг бодогдуулж, хэдий киноны дүр ч гэсэн бид бүгдийн сайн таних нэгэн хүнийг дурсан нүдэнд нулимс торох агшин, орь залуу насны дурсамжийг сэдрээсэн гэгээн гуниг төрөм тэр л агшнууд цөм бүгд энэ кинонд багтсан байна. Кино дуусахад танхимд суусан хүн бүр алга нижигнүүлэн ташиж, сэтгэл хөөрсөн нэгэн нь шүгэлдэж байлаа. Сайн кино болсныг эндээс харж болох юм. Танхимаас гарахдаа “анхны хайр минь санагдчихлаа” гэх дунд эргэм насны бүсгүйн үг энэ киног хүмүүсийн сэтгэлд хүрсэн бүтээл болсныг илтгэх буй за. Киноны талаар олон юм нуршаад яах вэ. Та бүхэн өөрийн нүдээр үзэж, дор бүрнээ дүгнэж цэгнэнэ биз ээ.
Уг киног бүтээсэн “HERO entertainment”, “B production” болон “Монгол кино” нэгтгэлийн хамт олонд талархсанаа илэрхийлье. Дуучин Болд, жүжигчин Ундрал, Эрдэнэбилэг нар ч тун чадварлаг тоглосон байна. Мөн үзэгчдийг үе үе түсхийтэл нь инээлгэж байсан жүжигчин Өөскө буюу Өнөржаргалын чадварлаг жүжиглэлтийг дурьдахгүй өнгөрч болшгүй нь. Эцэст нь хэлэхэд “Би чамд хайртай-2” киног зав гаргаад заавал үзээрэй.

Ubuntu 9.04 дээр GRUB 2 цэсийг дэвсгэр зурагтай болгох

2009-09-08T20:45:00.000-07:00

Эхлээд терминалаа нээнэ. (Applications > Accessories > Terminal)...

grub2-splashimages багцыг суулгана.

sudo aptitude install grub2-splashimages

Суулгаж дууссаны дараа /usr/share/images/grub хавтсанд хэдэн зураг хуулагдна.

/usr/share/images/grub хавтас уруу ороорой. Боломжтой зурагнууд нь .tga өргөтгөлтэй байгаа.

Өөрийн сонгосон зураг дээрээ хулганын баруун товчоо дараад Properties цэсний Basic талбар уруу ороод зурагны нэрийг (өргөтгөлөөс бусдыг нь) хуулж авна.

Зиа одоо /etc/grub.d/05_debian_theme файлыг нээгээд дараах өөрчлөлтийг хийгээрэй.

sudo gedit /etc/grub.d/05_debian_theme

for i in {/boot/grub,/usr/share/images/desktop-base}/moreblue-orbit-grub.{png,tga} ; do

дээрх мөрийг дараах мөрөөр солино.

for i in {/boot/grub,/usr/share/images/desktop-base,/usr/share/images/grub}/Moraine_Lake_17092005.{png,tga} ; do

Тодруулсан хэсэг нь таны сонгосон зурагны нэр шүү.

Зиа ингээд GRUB тохиргоог шинэчилнэ.

sudo update-grub

Үүний дараагаар системээ дахин ачааллахад grub цэс дэвсгэр зурагтай болсон байх болно.

USB 3.0 -ийг дэмжигч анхны эх хавтан

2009-09-07T21:32:00.000-07:00

Гарах гэж байна гэсэн сураг сонсдоод удаж байгаа өмнөх 2.0 хувилбараасаа бараг арав дахин хурдан USB 3.0 бодит биелэлээ олжээ. ASUS компани USB 3.0 –ийг дэмжих анхны эх хавтанг үйлдвэрлэсэн байна.
P6X58 Premium эх хавтан нь 2.0 ба 3.0 портыг хоюуланг нь дэмжих бөгөөд энэ нь хуучин болон шинэ USB төхөөрөмжүүдийг аль алиныг нь ашиглах сайхан боломжийг хэрэглэгчдэд олгож байгаа юм. Түүнчлэн ASUS –ынхан шинэ хуучин портыг хялбар ялгах боломжийг бүрдүүлэх үүднээс USB 3.0 холбогчуудаа хөх өнгөтэйгээр үйлдвэрлэсэн байна.
Хэдийгээр энэхүү эх хавтан нь хэдий хэрийн өртгөөр хэдийд худалдаанд гарах нь тодорхойгүй байгаа ч USB 3.0 албан ёсоор замдаа гарчээ.

Эх сурвалж: pcworld.com

Ubuntu 9.10 vs Kubuntu 9.10 Alpha versions

2009-09-06T21:09:00.000-07:00

Өнгөрсөн долоо хоногт Kubuntu 9.10 alpha 4 хувилбарыг туршиж үзмээр санагдаад Виндоус системтэй тооцоолуур дээр давхар суулгав. Өмнө нь миний бие Kubuntu ашиглаж байгаагүй болохоор өнгө төрх нь тун ч аятайхан юм шиг санагдаад таалагдвал ашиглаад баймаар санагдлаа шүү дээ. Суулгаж дууслаа. KDE дажгүй л юм байна гэсэн анхны сэтгэгдэл төрлөө дөө. Гэтэл нэг асуудал гардаг юм байна. Виндоувсын дискүүд рүү хандах гэхээр алдаа заагаад ер болсонгүй. Тухтай оролдох зав байсангүй болохоор түр хойшлуулаад байсан юм.

Харин өнгөрсөн долоо хоногийн сүүлээр Ubuntu 9.10 alpha 5 гарлаа гэсэн сургаар татаад авлаа. Яг одоо alpha 5 дээр ажиллаж байна. Суулгах явцаасаа эхлээд ер нь дажгүй санагдаж байна. Одоо ажиллаж байхад хүртэл.

Ганц асуудалтай зүйл нь grub меню дээр Bиндоус харагдахгүй байна лээ. Гэхдээ засах тун амархан.

#sudo update-grub2

командыг ажиллуулчихад л болоод явчихаж байна. Аа бас нэг юм хэлэхгүй өнгөрч болохгүй нь. Өмнөх хувилбарууд дээр grub меню дээрх бичлэгүүд /boot/grub/menu.lst файлд бичигдэж байсан бол одоо /boot/grub/grub.cfg файлд бичигддэг болсон байна лээ шүү.

За тэгээд Виндоувсын дискүүд рүү ямар ч асуудалгүйгээр хандаж байна. Дөнгөж суулгаад байгаа болохоор сайн туршаагүй л байна. Өнөөдөртөө багтааж бүхий л нүх сүвийг нь ухах бодолтой байна даа. Аа тийм, ер нь бол GNOME-доо л үнэнч байя даа гэсэн бодол ч бас төрж байна лээ шүү.

Жил дамнасан омогшил

2009-08-26T18:39:00.000-07:00

Одоогоос жилийн өмнө Түвшинбаяр, Бадар-Ууган хоёр Монгол хэмээх нэрийг дэлхийн дайдад дахин цуурайтуулж, Монгол улсын алтан соёмбот туг Олимпын наадмын тэнгэрт анхлан мандаж, төрийн дууллаа ертөнцийн анирт хүргэсэн билээ. Эдгээр түүхэн ялалтууд нь монгол хүн бүрийн үндэсний үзлийг илтэд сэргээж, Монголоо гэх омогшилыг бадраасан.

Энэ явдлаас хойш жилийн дараа буюу өнгөрөгч өдөр Монголчууд биднийг догдлуулж, бадруулж, баярлуулж, омогшуулсан бас нэгэн сайхан үйл явдал боллоо. Монголчууд бид жюдогийн Дэлхийн аваргатай боллоо. Тэртээх хориод жилийн өмнө авсан Дэлхийн дэд аваргын амжилтыг давууллаа. Сайхан байна. Барилдаан дууссаны дараа өөрийн эрхгүй омогшиж, огшиж суулаа.

Х.Цагаанбаатартаа дахин баяр хүргэе. Араасаа олон олон медаль дагуулсан булган сүүлтэй алт байх болтугай.

Play Classic DOS Games on Ubuntu

2009-08-24T23:49:00.000-07:00

Энэхүү бичлэгтээ Убунтучид, тэр дундаа тоглоомчин Убунтучиддаа зориулан сонгодог DOS тоглоомыг эмулятор ашиглан Убунту дээр хэрхэн тоглож болох тухай өгүүлэх гэж байна. Үүний тулд эмулятор болон DOS тоглоомоо хаа нэгтэйгээс татаж авсан байх ёстой.

Хамгийн чухал багц нь DOSBox.

“DOSBox нь Intel x86 PC –ний үүрэг гүйцэтгэх ба дуу, дүрс, хулгана, гар, модем гээд орчин үеийн компьютер болон үйлдлийн системүүд болох Windows XP, Vista, Linux, FreeBSD зэрэг дээр ажиллах боломжгүй хуучны MS-DOS тоглоом тоглоход шаардлагатай бүхий л зүйлсээр тоноглогдсон байдаг. “

Убунту дээр DOSBox –ийг суулгах тун амархан (ямар ч програм суулгахад амар шүү дээ. Энэ нь Убунтугийн нэг гол давуу тал гэж би хувьдаа боддог).

sudo apt-get install dosbox

Дараа нь өөрийн тоглоомуудаа хадгалах хавтсыг үүсгэнэ. Жишээ нь

mkdir /home/jun/dosgames

Үнэгүй DOS тоглоомыг олоход тун хялбар. Гүүгл ах таньд харамгүй туслах болно. Жишээ нь Мario Brothers VGA тоглоомыг эндээс татаж болно.

Татаж авсан файлаа задлахаар mario.exe гэсэн файл үүснэ. EXE файлыг DOSBox ашиглан ажиллуулна шүү дээ. Дараах командыг ашиглана:

dosbox

DOSBox –ийн харагдац нь дараах байдалтай

DOSBox –ийн бүрхүүл дээрээс тоглоомоо хадгалсан хавтсыг ачааллана (mount).

mount c /home/jun/dosgames

С хуурмаг диск рүү орно.

С:

Одоо Mario Brothers-ийэ ердөө л mario.exe гэж бичээд л тоглож болно.

Тоглож байхдаа анхаарах ганц зүйл нь зөвхөн зааварт буй товчлууруудыг л дараарай.

За тэгээд DOSBox –ийг ашиглан Wolfeinstein 3D, Alley Cat, Duke Nukem, Hocus Pocus, Crystal Caves зэрэг алдартай DOS тоглоомуудыг тоглоод байж дээ. Амжилт хүсье залуусаа.

Top 10 open source project

2009-08-21T00:12:00.000-07:00

Open source буюу нээлттэй эх, нээлттэй эхийн програмууд компьютерийн хэрэглэгчидтэй танил болоод багагүй хугацаа өнгөрчээ. Манай улсад ч мөн адил хулгайн програм, нээлттэй эхийн програмын ялгааг мэддэг, нээлттэй эхийн давуу талуудыг мэдрэх болсон хүмүүс цөөнгүй. Нээлттэй эхийн програм хангамж, үйлдлийн системүүдийг сонирхогч хүмүүсийн сайн дурын нэгдэл, бүлгэмүүд ч бий болжээ.

Нээлттэй эхийн програмууд дотроос хамгийн түгээмэл хэрэглэгдэж буй Firefox, OpenOffice зэрэг програмуудыг жишээ болгон дурьдаж болж байна. Харин эдгээр програмуудаас хамгийн шилдэг нь юу вэ гэдгийг шалгаруулдаг байгууллага бас байдаг юм байна. Оны шилдгүүдийг тодруулахаас гадна хамгийн шилдэгийг нь “Алдрын танхим”-д мөнхжүүлдэг гэнэ. Энэ байгууллага нь InfoWorld (www.infoworld.com) бөгөөд Bossie Awards хэмээх шалгаруулалт явуулж оны шилдэг нээлттэй эхийн програмыг зарладаг аж.

Би энэ бичлэгтээ оны шилдэг програмыг бус InfoWorld –ийн Алдрын танхимд заларсан бүх цагийн үеийн хамгийн шилдэг 36 нээлттэй эхийн програм хангамжийн эхний 10-г танилцуулах гэж байна.

Linux кернел

Linux нь анхны нээлттэй эхийн програм хангамжийн төсөл биш боловч, интернэтийг ашиглан дэлхийн өнцөг булан бүрээс олон тооны хөгжүүлэгчид хэрхэн хамтран ажиллаж, ямар их хүч гарч болохыг харуулсан төслүүдийн нэг юм. Олон мянган төслийн үр дүнд бий болсон янз бүрийн үйлдлийн системийн тархацуудын үндэс суурь нь яах аргагүй Linux кернэл юм.

GNU хэрэгслүүд болон комплятор

GNU нь нээлттэй эхийн програм хангамжийн шилжилтийн манлайлагч нь юм. Түүнчлэн Линукс кернелтэй нэгдсэнээр бүрэн төгс үйлдлийн системийг цогцлоодог олон янзын хэрэгсэл, хэрэглүүрүүдийн эх сурвалж юм. Линукс кернел ба GNU хэрэгслүүд болон компляторыг Линуксын ертөнцийн эцэг хүү ариун сүнс гэх нь ч бий.

Ubuntu

Ubuntu –ийн анхны зарчим болох ашиглахад хялбар байдал нь энгийн хэрэглэгчдийг өөртөө татахаас гадна компьютерийн үйлдвэрлэгчид өөрсдийн бүтээгдэхүүндээ энэхүү үйлдлийн системийг дагалдуулан худалдаалахад хүргэсэн. Debian үйлдлийн системээс уламжилж гарсан уг систем нь түүний хамгийн гол давуу талуудын нэг болох apt-get хэмээх багц удирдах системийг өөртөө агуулсан байдаг.

Гурван BSD

Линукс нь цорын ганц нээлттэй эхийн үйлдлийн систем биш ба хамгийн шилдэг нь ч биш юм. FreeBSD чанар, найдвартай гүйцэтгэлээрээ алдартай билээ. NetBSD нь эмбеддэд систем, хөдөлгөөнт төхөөрөмж зэргийг багтаасан маш олон төрлийн техник хангамжийг дэмждэг үйлдлийн систем. Харин OpenBSD нь хамгийн аюулгүй Юникс төст үйлдлийн систем юм.

Samba

Samba –г Linux болон Windows-ийг холбогч гүүр гэж үзэж болох юм. Үүнийг ашигласнаар Линукс/Юникс серверт Windows хэрэглэгч холбогдох, Юникс/Линукс хэрэглэгчид Windows файл системд холбогдох боломжтой болдог. Түүнчлэн Samba нь Windows сүлжээний domain controller байдлаар ажиллах чадвартай.

MySQL

Энэхүү өгөгдлийн сангийн сервертэй маргах хүн бараг гарахгүй биз дээ. Удирдахад хялбар, гүйцэтгэл сайтай, гарын авлага олдоц сайтай гээд маш олон давуу тал нь MySQL –ийг ихэнх вэб сайтууд сонгоход хүргэдэг биз.

BIND

Интернэтийн эрин үеийн хамгийн алдартай DNS сервер бол яах аргагүй BIND (Berkely Internet Name Domain) юм. Үүний ачаар бид цээжилж тогтооход бэрх IP хаягны оронд энгийн миний[цэг]мн гэх мэт нэрийг ашиглах болсон билээ.

Sendmail

Интернэт стандартчилагдаагүй байхад бий болсон Sendmail сервер нь 1980-1990-ээд онуудад интернэт шуудангийн системийн үндэс суурь нь болж байлаа. Хэдийгээр сүүлийн үед Postfix, Qmail зэрэгт байр сууриа алдаад байгаа боловч одоо хэр нь нэр хүндээ алдаагүй л байна.

OpenSSH

OpenSSH болон OpenSSl нь интернэтийн хамгаалалттай холболтыг бий болгоход зориулагдсан үнэгүй, нээлттэй эхийн хамгийн чухал хэрэглүүрүүдийн нэг юм. OpenSSH нь холболтын явцад дамжуулагдаж буй мэдээллийг шифрлэхэд зориулагддаг бол OpenSSL нь програм хөгжүүлэгчдэд SSL болон TSL-ийг ашиглан програмчлах боломжийг нээж өгдөг сан юм.

Apache

Дэлхий дээрх нийт вэб сайтуудын тэн хагас (112 сая орчим) нь энэхүү серверийг ашигладаг. LAMP гэсэн товчлолын А-аар илэрхийлэгдэх уг веб сервер нь уян хатан, хурдан, аюулгүй гэгддэг ба маш олон үйлдлийн систем, вэб програмчлалын хэлүүдийг дэмжихээс гадна маш олон тооны өргөтгөлүүдийг нэмж ашиглах боломжтой байдаг.

Эх сурвалж: InfoWorld[dot]com

Ботнетийг удирдах командын шинэ суваг- Твиттер

2009-08-17T18:47:00.000-07:00

Хаана л шинэ юм гарна, тэнд болдоггүй нөхдүүд хамт явж л байх юм даа. Сүүлийн үед дэлхий нийтээр өргөн ашиглах болсон мэдээллийн шинэ суваг болох Твиттерийг муу залуус зүгээр орхисонгүй. Өмнө нь “JoeJob” хэмээх DDoS халдлага хийж Твиттерийн хэвийн ажиллагааг тасалдуулж байсан бол одоо Ботнэтийг удирдах командын суваг байдлаар ашиглах болжээ.

Ботнэтийг ихэвчлэн IRC (internet relay chat) суваг ашиглан удирддаг. Одоо нэгэнт дахин нэг суваг шинээр бий боллоо. Үүнтэй зэрэгцээд гарах нэг хүндрэлтэй асуудал нь твиттерийн олон сая хэрэглэгчидтэй холбоотой асуудал. Хэдэн хэрэглэгч твиттерийг буруу зорилгоор ашиглаад байна, яг хэн нь гэх мэт.

Энэ асуудал дээр твиттер санаа тавих биз ээ. Удахгүй Твиттерийг бусармаг үйлдээ ашиглаж байгаа хэрэглэгчийг илрүүлдэг болно гэдэгт итгэж байна.

Та бүхэн сонирхвол дараах блогоос илүү дэлгэрэнгүйг уншиж болно:

Твиттерт суурилсан ботнэт командын суваг

Нутгийн зам

2009-08-12T22:13:00.000-07:00

Нутгийн зам нуруутай

Нуган үрдээ ханилгаатай...

Сайхан дуу шүү. Миний мэтийн төрсөн нутаг, төрүүлсэн эцэг эхээсээ хол суудаг хүмүүст бол бүр ч ойрхон дуу.

Өнгөрөгч сарын сүүлээр нутгийн зүг жолоо залах сайхан боломж тохиов. Ижий аавдаа золгоод, нутаг усаа нэг үзээд хэд хоног цэвэр агаарт амраад ирэх боломж гарлаа гэсэн үг. Нутгаа зорих ч сайхан шүү.

Хэд хоног бэлдсэний эцэст алсын замд гарлаа даа. Тэнгэрээр бол хэдхэн цаг яваад хүрэх ч газраар явахад хэд хоног авах их зам. Дээгүүр явахад зардал их, доогуур явбал зардал нь хямд тэгээд ч урин дулаан цаг болохоор газраар явахад нэг их хүндрэл байхгүй болохоор газраар явах болсон. Аян замд унаа тэрэг маань сааталгүй явах болтугай гэж залбираад л гарсан даа. Зам зуур бага зэрэг аяншиж ядрах боловч төрсөн гэртээ очих гэж байгаа болохоор энэ зэргийн юмыг ер ажрахгүй.

Энэ жил ихэнх нутгаар хур бороо дутмаг, газрын гарц тааруухан, өнгө гундуу байгаа юм шиг санагдав. Бороо хур нийслэл хотод л их оржээ. Хотод бороо орох онц шаардлага алга, мал амьтан ихтэй хөдөөгүүр тэр бороо нь орж байхгүй дээ гэсэн сонин ч гэмээр бодол төрж явлаа.

Хаа сайгүй замын ажил өрнөж байна. Гэхдээ зам засч байгаа нэртэй зам хааж, шороо овоолсон хэрнээ ажил хийж байгаа хүн огт харагдахгүй газар нэлээд их харагдлаа. За тэгээд сайжруулсан шороон зам нэртэй хүн, машины уцаарыг барсан зам их таарна. Анхандаа ч сайжруулсан л байж таарна л даа. Бороо шороо, том тээврийн хэрэгсэл энэ тэрээс болдог болов уу яг л нидрүүл гэсэн үг. Муухан машины хамаг эрэг боолт нь салж унамаар, эрүү султай хүн явбал эрүү нь ч мултарч мэдэхээр зам юм.

Зам дагаж хөгжил гэж юутай үнэн үг вэ. Мянганы замыг түргэн хугацаанд барьч чадвал манай улсын хөгжилд том ахиц гарахаар аж. Зам сайн бол төвөөс зайдуу аймаг, орон нутгийн ард иргэд хот руу нүүх нүүдэл ч багасах нь тодорхой. Дэд бүтцийн хөгжил муу байгаагаас л хүмүүс хот руу их нүүж байна уу даа гэж надад санагддаг. Зам сайтай бол тээврийн зардал, цаг хугацаа хэмнэгдэнэ. Энэ нь эргээд холын аймгуудад худалдаалагдах бараа бүтээгдэхүүний үнэд нөлөөлнө, ард иргэдийн амьдралд ч эерэг нөлөө үзүүлнэ. За тэгээд зам зуур тааралдах гэр гуанзны оронд том том буудлууд баригдаж эхлэнэ. Тэр нь яваандаа суурин болно гэх мэт... Энэ бүгдээс харахад замаа л хурдхан барих хэрэгтэй юм байна. Төр засаг энэ тал дээр анхаарлаа хандуулах ёстой болов уу. За ингээд бичээд байвал олон байна. Түр азная.

Бүтэн хоёр хоног үргэлжилсэн урт аян дуусч төрсөн гэрийн босго алхав. Ижий аав, эмээдээ үнсүүлээд аян замын тоосоо арилгаад би гэдэг хүний хэд хоногийн амралт эхэлж байгаа нь тэр ээ.

Хөдөө гадаа, хүний хөлөөс зайдуу (интернэтгүй болохоор бүр ч хол) яарах ажилгүй, тааваараа хэд хонолоо. Юм эхэлсэн бол дуусдаг хойно миний хэд хоногийн амралт ч дуусах талдаа орж суугуул нутгийн зүг жолоо залах цаг болов.

Замд дахин хоёр хоногийг үдэж, Улаанбаатар хотод ирэв. Бага зэрэг санасан ч юм шиг. Тэр дундаа интернэтийг бүр ч их санажээ. Гэртээ ирэнгүүтээ л тооцоолуураа асаан интэрнэт гэгч өргөн далайн хаана нь ямар салхи салхилж байна хэмээн аялж сууна.

Nmap 5.0 released

2009-07-22T19:34:00.000-07:00

2009 оны 7 сарын 16 –нд insecure.org сайтад http://nmap.org сайтаас Nmap Security Scanner 5.0 хувилбарыг үнэгүй татаж авах боломжтой болсныг мэдэгджээ. Энэ нь өнгөрсөн есдүгээр сард гарсан 4,76 хувилбараас хойшхи анхны албан ёсны хувилбар аж. Олон тооны хөгжүүлэлтийн хувилбаруудын үр дүнд энэхүү шинэ хувилбар гарсан байна.Хэрвээ та nmap ашигладаг бол яг одоо шинэ хувилбарыг татаж авахыг зөвлөх байна.

Nmap 5 дахь чухал 5 сайжруулалт
1. Өгөгдөл дамжуулах, чиглүүлэх, дебаг хийх зориулалт бүхий цоо шинэ Ncat хэрэглүүр нэмэгдсэн байна. Түүнчлэн Ncat –ийг ашиглан сүлжээний удирдлага зохицуулалт болон аюулгүй байдлын шалгалтыг хэрхэн хийх дэлгэрэнгүй хэрэглэгчийн гарын авлагыг боловсруулсан байна.
2. Шалгалт, харьцуулалт хийхэд ашиглагдах Ndiff хэрэглүүр. Энэ хэрэглүүр нь Nmap –ийн сүлжээний админууд болон аюулгүй байдлын мэргэжилтнүүдийн аль нь ч хэрэглэж болохуйц нэгэн цогц систем болон хөгжиж байгаагийн нэг илрэл юм. Ndiff нь таны сүлжээг өдөр бүр автоматаар шалгаж, ямар нэг өөрчлөлт гарсан тохиолдолд тайлагнадаг хэрэглүүр юм.
3. Nmap –ийн гүйцэтгэл маш ихээр сайжирсан.
4. Nmap Network Scanning хэмээх Nmap –ийн бүрэн хэмжээний гарын авлагыг боловсруулсан байна. Энэхүү гарын авлага анхан шатны порт чагнахаас эхлээд ахисан шатны аюулгүй байдлын шалгалтуудыг ч хэрхэн хийх талаар дэлгэрэнгүй тайлбарласан байна.
5. Nmap Scripting Engine (NSE) бол Nmap –ийн хүчирхэг, уян хатан нэмэлтүүдийн нэг юм. Энэ нь хэрэглэгчдэд энгийн скрипт бичиж сүлжээний маш олон ажлуудыг автоматжуулах боломжийг бүрдүүлж өгдөг. Өмнөх хувилбаруудад байсан скриптүүдийг сайжруулсан төдийгүй 32 шинэ скрипт нэмэгджээ.

Цуврал 1-3. Иван Айвазовский

2009-07-20T17:39:00.000-07:00

Та бүхэнд дэлхийд нэр алдар нь түгсэн зураачдын намтрыг цувралаар хүргэж байгаа билээ. Энэ удаад далайн зургийн нэрт мастер Айвазовскийн амьдрал уран бүтээлээс хүргэж байна хүлээн авна уу. Хэрвээ та өмнө нь уран зураг сонирхож байгаагүй, дэлхийн урлагийн түүхнээ үлдсэн агуу зураачдын бүтээлүүдийг харж байгаагүй бол Айвазовский, Шишкин, Пизарро зэрэг мастеруудын бүтээл таныг бишрүүлэх нь дамжиггүй гэж мунхаг би бодном.

Иван Айвазовский 1817 онд Кримын Феодосиа хэмээх тосгонд Армен худалдаачны гэр бүлд төржээ. Эцэг эх нь тэр үед хүндхэн нөхцөлд аж төрдөг байсан учир түүний бага нас ядуу зүдүү амьдралын дунд өнгөрчээ. Түүний авьяастайг олж харсан нэгэн хүний тусламжтайгаар Симферополын гимназид элсэн орж, улмаар Санкт-Петербургийн урлагийн академид суралцаж байгалийн зураг тэр дундаа далайн зураг зурах сонирхолтой болсон гэдэг. 1836 онд Айвазовский далайн 5 зураг Академийн үзэсгэлэн дээр танилцуулж, тэдгээр зургууд нь маш өндрөөр үнэлэгджээ. Мөн 1837 онд “Финландын булангийн нам гүм” (1836) бүтээлээрээ алтан медаль хүртэж, “Кронстадтын их зам” (1836) бүтээл нь түүнд хилийн чанадад урт хугацаагаар суралцах замыг нээж өгсөн. Гэсэн хэдий ч зураач маань төрөлх Кримын тэнгисээ зурж өөрийн сонгосон жанртаа төгс болохын тулд нутгаа зорив.

1840-1844 онд Айвазовский Урлагийн академийн зардлаар Италид суралцаж, тэр хугацаандаа Герман, Франц, Испани болон Голландаар аялжээ. Тэрээр маш шаргуу хөдөлмөрлөж, олон олон үзэсгэлэнд оролцсон ба түүний хаа явсан газар нь аз хийморь, амжилт үргэлж дагаж явсан юм. Түүний “Наплийн булан сарны гэрэлд” (1842), “Далайн эрэгт. Нам гүм” (1843) зэрэг олон тооны далайн зургууд Италид алдаршжээ.

Түүний бүтээлүүдийг Английн байгалийн болон далайн нэрт зураач Ж.У.Т Тьюрнер тун өндрөөр үнэлсэн гэдэг. Айвазовский уран бүтээлийнхээ он жилүүдэд далайн хөдлөл, гуа сайхан, сүр хүчийг дүрслэн өөрийн гэсэн арга барилыг бий болгожээ. Ямар нэгэн эскиз, ноороггүйгээр санаанаасаа зурах агаад харандаагаар бүдүүн хүрээ тавихаас зайлсхийдэг байлаа. Түүний ер бусын ой санамж, романтик төсөөлөл нь бүтээлийг дахин давтагдашгүй гайхамшигтай болгодог байж. Түүний үргэлж өсөн нэмэгдэж байсан романтик хандлага нь зураачийн уран төсөөллийг нэгдүгээрт тавигдахад хүргэжээ.

Тэрээр 1844 онд Санкт Петербург хотдоо эргэн ирээд Академич цол хүртсэн ба Усан цэргийн удирдах газартай холбоо тогтоож амжсан байлаа. Энэ нь түүнийг Оросын флотын хамтаар янз бүрийн зорилгоор аялах боломж олгожээ. Тэрээр Турк, Грек, Египт, Америкаар аялсан юм. 1846-1848 онуудад Оросын усан цэргийн түүхэн тулааны үнэн хөрөг болж чадсан “Чезмегийн тулаан” (1848), “Чиосын сувгийн тулаан” (1848) зэрэг далайн дайны хэд хэдэн томоохон бүтээл туурвижээ.

1850-аад оноос Айвазовскийн уран бүтээлд романтик шинж нь илүү давамгайлах болсон. Түүний хамгийн шилдэг төдийгүй хамгийн нэрд гарсан бүтээл болох “Арав дахь давалгаа” (1850) болон “Сартай шөнө” (1849), “Коктебел тэнгис” (1853), “Шуурга” (1854) зэрэг олон бүтээлээс нь тэрхүү өнгө аясыг харж болох юм.

Оросын урлагийн хөгжлийг тодорхойлох 19-р зууны хоёрдугаар хагасын үйл явдлууд Айвазовскийн уран бүтээлд ч хүчтэйгээр нөлөөлсөн. Шинэ реалист хандлагууд түүний уран бүтээлд харагдах болсон ч романтик чанар нь хадгалагдан үлдсэн юм.

Уран бүтээлийн энэ үеийнх нь хамгийн шилдэг бүтээл нь далайн ааш аягийг үргэлжийн хөдөлгөөнтэй амьд юм шиг дүрсэлж чадсан “Хар тэнгис” (1881) юм. Түүний амьдралын сүүлийн мөчүүддээ зурсан томоохон бүтээлүүдэд “Солонго” (1873), “Сүйрэл” (1876), “Давалгаан” (1889) багтдаг.

Айвазовский өөр өөрийн гэсэн үнэ цэнэтэй 6000 гаран бүтээлийг өнөө бидэнд үлдээжээ. Энд дэлхийн сонгодог бүтээлүүд ч бий, бас тийм ч сайн биш бүтээл ч бий. Айвазовский элбэг хангалуун амьдралтай байлаа. Тэрээр буяны үйлд маш их мөнгө зарсан бөгөөд ихэнх хувийг нь өөрийн төрөлх тосгондоо зориулсан гэдэг. 1865 онд Феодосиад анхны Урлагийн сургууль байгуулсан бол 1889 онд Дүрслэх урлагийн галлерей нээжээ. Тэрээр Штутгарт, Флоренц, Ром болон Амстердамын академийн гишүүн байлаа.

Далайн нэрт зураач Иван Айвазовский 1900 онд таалал төгсчээ.

Виндоус систем дээр үл үзэгдэгч хавтас үүсгэх

2009-07-19T19:37:00.000-07:00

Ойрдоо зав муутай байсан болохоор блогтоо бичлэг нэмж чадсангүй. Энэ удаа Виндоус систем ашигладаг хүмүүст сонирхолтой байх болов уу гэж бодсон нэгэн бичлэгийг хүргэж байна.

Алив хүнд бусдаас нуух шаардлагатай мэдээллүүд байдаг. Тэднийгээ бусдаас нуухын тулд янз бүрийн арга хэрэглэх нь бий. Хавтас түгждэг програм ашиглах, хавтсаа нуух гэх мэт. Энд та бүхэнд дээр дурдсанаас арай өөр, энгийн нэгэн аргыг танилцуулж байна. Туршаад үзээрэй. Таалагдвал сэтгэгдэл үлдээнэ биз ээ.

1. Шинэ хавтас үүсгэх
2. Хулганын баруун товчийг дарж, унадаг цэснээс 'Rename'-ийг сонго. Гэхдээ нэрийг нь солихгүй
3. ALT товчийг дарж байгаад 0160 гэж бичээрэй. (үсэгнүүдийн дээр байрладаг тоог ашиглаж болохгүй. Зөвхөн гарны баруун талд байрлах тоонуудыг ашиглаарай)
4. Enter дарна.

За ингээд таны шинээр үүсгэсэн хавтасны нэр харагдахгүй болно. Харин одоо нэргүй хавтасныхаа тэмдгийг (icon) солиорой.
5. Баруунаа дараад Properties>Customize>Change Icon
6. Тэмдгүүдийг гүйлгэж байхад бага зэргийн хоосон зай гараад ирнэ. Тэр зайнд дарахад "үл үзэгдэгч" тэмдэг сонгогдоно. За ингээд л боллоо. Та нүдэнд үл үзэгдэгч хавтас үүсгэчихлээ шүү дээ.

За тэгээд асуудал гарвал энэ бичлэгийг харна биз ээ.

Монгол наадам

2009-07-11T18:49:00.000-07:00

Яг энэ цаг мөчид Монголчууд бид хотол олноороо наадан цэнгэж байна. Ардын хувьсгалын яруу алдарт 88 жилийн ой, Их Монгол улс байгуулагдсаны түүхт 803 жилийн ойн баяр энэ өдрүүдэд тохиож байгаа билээ. Чухам энэ өдрүүдэд Монгол хүн бүрийн цээжинд Монгол хүн гэдгээрээ бахархах сэтгэл төрж, Монгол хүн гэдгээ улам бүр мэдэрдэг болов уу гэж боддог. Хүн бүрийн магнай тэнүүн байж гэмээн наадам маань өргөн дэлгэр болж, тэнгэр хангай хүртэл нар хураан тэгшитгэн хайрладаг билээ. Энэ жилийн наадам сайхан болж байна.
Би боддог юм. Хэнийг Монгол хүн гэх вэ гэж... Хамарнаас нь эхийн сүүний үнэр арилаагүй, өлчир бяцхан дааганаас эхлээд олон түмэнд нэр алдар нь түгсэн, хурд шандас нь тодорсон их морьд төрийн наадамд торгон жолоо өргүүлэхэд самсаа шархиран босч ирэх тэр хүмүүн Монгол хүн. Улсын баярт 10 даваад төрийн 9 цагаан тугаа тойрч буй эр бяр, бие хаа, ур ухаан цөм бүгд онцгойрсон идэр залууг хараад цээжинд нь эр бяр амтлагдах энэ хүмүүн Монгол хүн. Энэ сайхан мэдрэмжийг үгээр илэрхийлэх, тайлбарлах аргагүй биз. Би хувьдаа Монгол хүн бүрт ийм мэдрэмж төрдөг болов уу гэж боддог юм.
Өнөөдөр Монгол хүн бүр тэр бөх ч энэ жил өнгөтэй байна, тэдний хүү цол нэмнэ, манай нутгийн бөх түрүүлнэ хэмээн таавар уралдуулан битүүхэндээ хэн нэгнийг төрийн наадамд түрүүлээсэй хэмээн хүсч суугаа биз. Миний хувьд ч мөн адил. Бөхийн таавар тань мэргэн байх болтугай гэж ерөөе.
Монгол түмэн минь сайхан наадаарай.

Ном ...

2009-07-08T02:35:00.000-07:00

Саяхан нэгэн блог дээрээс номны тухай бичлэг олж уншив. Яг энэ сэдвээр миний бие бичнэ хэмээн санаж байсан билээ. Ном хэмээх тэр ариун зүйлийн тухай өөрийн санаа, номтой нөхөрлөж явсан он цаг, одоо ном бид хоёрын харьцаа ямар байгаа талаар өгүүлсү.
Миний уншсан хамгийн анхны ном бол “Желсомино худал хуурмагийн оронд”. Би тэр үед нэгдүгээр ангийн сурагч байлаа. 35 үсгээ дөнгөж сурч дуусаад, уншиж сураад байсан үе. Аав маань өөрөө сонинд нийтлэл, орчуулгын бүтээлүүдээ хэвлүүлдэг сэтгүүл зүй, уран зохиолд элэгтэй нэгэн болохоор надад ном бэлэглэсэн болов уу. Цагаан толгой дээрх жижиг эхүүдийг уншиж байсан болохоос утгын холбоос бүхий хэдэн зуун хуудас том бичвэр огт уншиж дадаагүй надад бүхэл бүтэн ном унших нь тун сонин байлаа. Хичээлээ тарж ирээд өнөөх номоо тэвэрч аваад сууна даа. Одоо эргээд бодоход тун ч хөөрхөн ном байсан санагддаг юм. Энэ үеэс мөхөс би ном хэмээгчид дурлаж, багагүй хугацааг түүнтэй хамт өнгөрүүлэх болсон доо.
Хүүхэд ахуй минь ардчилсан хувьсгалын дараах үед өнгөрсөн болохоор шинэ ном олоход хүндрэлтэй байдаг байлаа. Магад ном хэвлэх хөрөнгө зоорь хүн бүхэнд дутмаг байсантай холбоотой биз. Харин хуучны номыг айл амьтан, номын сангаас яаж ийгээд олчихно. Манай гэрт номноос их юм үгүй мөртөө миний уншиж чадах нь түүн дотор даанч байдаггүй нь гачлантай байв. Нэг бол болгар үгүй бол орос хэл дээрх номнууд өрөөстэй. Тухайн үед хамаатны нэг эгч маань аймгийн номын санд ажилладаг байсан нь миний хувьд тун их завшаантай хэрэг байлаа. Байсхийгээд л гүйж очоод тийм ч ном олоод өг гэж гуйна. Миний санахаар эгчийн маань олж өгч чадаагүй ганц ном нь “Робинзон Крузо”. Номын санд нь ганц байдаг болохоор хамаагүй хүн амьтанд өгдөггүй байсан биз. 5, 6 жилийн өмнө хүслэн болсон “Робинзон Крузо”-гоо уншсан даа. Гэхдээ надад олдсон Крузогийн төгсгөлийн хэдэн хуудас нь урагдчихсан байсан. Уншиж дуусаагүй байгаа гэсэн үг.
Анх номын амтанд ороод байхдаа олдож л байвал ямар нь ч хамаагүй уншдаг байлаа. 2 дугаар ангидаа М.Горькийн “Эх” романыг уншиж билээ. 8, 9 настай хүүхдэд дэндүү ахадсан зохиол байсан даа. Уншаад бараг ойлгохгүй, осолдохгүй л бүх хуудсыг уншиж дууссан байх. Оросын хувьсгалын үеийн амьдрал, хувьсгалын нууц бүлгэмийн гишүүн нэгэн хүүгийн талаар гардаг санагдана. Бүүр түүрхэн л санаж байна. Тэр жил уншсан хамгийн том ном “Монголын Нууц Товчоо” байлаа.
Дэлхийн сонгодогууд гэж нэрлэгдэх зохиолчдын олон ч зохиолыг уншсан. Гэхдээ мэдээж өмнөх нийгмийн шүүлтүүрийг давж гарсан сонгодгууд л олдоно. Майн Рид, Жек Лондон, Александр Дюма, Жюль Верн, Марк Твен, Эрнест Хэмингуэй, О.Ян, Артур Конан Доль, Д.Намдаг, Л.Түдэв. Бөхийн Бааст гээд л гадна дотны олон ч зохиолчдын бүтээлүүдийг арван жилийн сурагч цагтаа уншиж дуусгасан даа. Эдгээрээс ой тоонд хамгийн тод үлдсэн нь Жек Лондоны “Цагаан соёот”, Дюмагийн “Монте Кристо гүн”, Конан Долийн “Шерлок Холмсын” тухай цувралууд, мөн Түдэв гуайн “Үл ойлгогдох онцгой учралууд”. Түдэв гуайн бичсэн хүүхдийн зохиолуудыг хүүхдүүддээ заавал уншуулаарай гэж ирээдүйн эцэг эхчүүдэд зөвлөх байна. Манай үеийнхэн гэж ярьвал ном уншдаг хүн тун цөөхөн байсан болов уу. Sony, Sega л их тоглож цаг өнгөрөөдөг байсан байх даа. Би бодохдоо өөрийгөө дээрхэн үеийн “Номын сайн нөхөр” тэмдгийн эзэн гэж боддог юм. Гэхдээ одоог хүртэл Лодойдамба гуайн “Тунгалаг Тамир”-ыг уншаагүйгээ бодохоор ичмээр дамшиг даа. Монголын зохиолчдын бүтээлийг тун ховор уншиж байжээ.
За тэгээд хүүхэд нас, сурагч үеэ үдэж оюутан болсноор ном унших, тэр дундаа уран зохиолын ном уншихыг бараг мартаж орхисон доо. Мэргэжлийн ном бол уншнаа. Уран зохиолын ном бариад суух цаг зав гардаггүй байсан юм гэвэл өөрийгөө өмөөрсөн болдог байхдаа. Ойрын үед уран зохиолын ном унших сонирхол минь дахин сэргээд байгаа. Тэр дундаа монголын зохиолчдын зохиол бүтээлүүдийг унших хэрэгтэй гэж бодоод байгаа. Тиймдээ ч саяхан номын дэлгүүрээр шагайж Г.Аюурзана нарын түүвэрлэн эмхтгэсэн “Монголын сонгомол өгүүллэг” гэсэн тун аятайхан ном олж аваад үдшийг хамт өнгөрөөж байгаа. С.Эрдэнэ, Д.Намдаг гуайн өгүүллэгүүдийг уншаад сууж байхад монгол хэлний хичнээн яруу тансагийг бишрээд баршгүй. Манай зохиолчид зохиол бүтээл дэх дүр, эд юмс бүрийг эс ширхэгчлэн тоочиж, уран яруугаар дүрслэн бичих нь барууны зохиолчдын бичлэгийн хэв маягаас тэс ондоо, илүү уянгалаг юм. Энэ нь дорнын хүмүүсийн онцлог биз. Түүнчлэн шавхагдашгүй баян монгол хэл маань ч ихээхэн нөлөөлдөг болов уу.
Монгол хэл, бичгээ зохих хэмжээнд нь, алдаа мадаггүй, зөв хэрэглэж сурахад ном, тэр дундаа Монголын шилдэг зохиолчдын зохиол бүтээлүүд тун их тус хүргэнэ гэж би боддог. Яруу сайхан монгол хэлээ дээдлэн биширч, үеийн үед хадгалж явья...

10 Linux commands you’ve never used

2009-07-07T19:11:00.000-07:00

Линуксын бүрхүүл дээр ашиглагддаг бүхий л командыг гартаа оруулахын тулд магадгүй хэдэн арван жил шаардагдах биз ээ. Энд харин та бүхний сонсож дуулаагүй, ашиглаж үзээгүй байж магад 10 командыг танилцуулж байна. Гэхдээ зарим нэг нь ашигладаг байлгүй дээ. Миний хувьд эдгээрээс mkfifo, lsof хоёрыг л ашигладаг, bc –г ашиглаж үзэж байсан. Бусдыг нь мөн л анх удаа харж байна J

pgrep, -ийг дараах командын оронд:

# ps -ef | egrep '^root ' | awk '{print $2}'
1
2
3
4
5
20
21
38
39
...
Нэг иймэрхүү байдлаар:
# pgrep -u root
1
2
3
4
5
20
21
38
39
...
pstree, процессын жагсаалтыг мод хэлбэрээр харуулна. WebSphere гэх мэт том том програмууд дээр ажиллах үед тун хэрэгтэй гэнэ шүү.

# pstree
init-+-acpid
|-atd
|-crond
|-cups-config-dae
|-cupsd
|-dbus-daemon-1
|-dhclient
|-events/0-+-aio/0
| |-kacpid
| |-kauditd
| |-kblockd/0
| |-khelper
| |-kmirrord
| `-2*[pdflush]
|-gpm
|-hald
|-khubd
|-2*[kjournald]
|-klogd
|-kseriod
|-ksoftirqd/0
|-kswapd0
|-login---bash
|-5*[mingetty]
|-portmap
|-rpc.idmapd
|-rpc.statd
|-2*[sendmail]
|-smartd
|-sshd---sshd---bash---pstree
|-syslogd
|-udevd
|-vsftpd
|-xfs
`-xinetd
bc –ийг ашиглаад тооцоолол хийж болно. Жишээ нь квадрат язгуур гаргах гэх мэт.

# ./sqrt
Usage: sqrt number
# ./sqrt 64
8
# ./sqrt 132112
363
# ./sqrt 1321121321
36347
Here is the script:
# cat sqrt
#!/bin/bash
if [ $# -ne 1 ]
then
echo 'Usage: sqrt number'
exit 1
else
echo -e "sqrt($1)\nquit\n" | bc -q -i
fi
split, том хэмжээний файлыг жижиг хэсгүүдийг хуваах шаардлага гарвал та энэ командыг л ашиглах хэрэгтэй. Дараах жишээнд 250МВ файлыг 2МВ хэмжээтэй LF_ -ээр эхэлсэн нэртэй жижиг хэсгүүдэд хэрхэн хуваахыг харуулсан байна.
# ls -lh largefile
-rw-r--r-- 1 root root 251M Feb 19 10:27 largefile
# split -b 2m largefile LF_
# ls -lh LF_* | head -n 5
-rw-r--r-- 1 root root 2.0M Feb 19 10:29 LF_aa
-rw-r--r-- 1 root root 2.0M Feb 19 10:29 LF_ab
-rw-r--r-- 1 root root 2.0M Feb 19 10:29 LF_ac
-rw-r--r-- 1 root root 2.0M Feb 19 10:29 LF_ad
-rw-r--r-- 1 root root 2.0M Feb 19 10:29 LF_ae
# ls -lh LF_* | wc -l
126
nl мөрийг дугаарлана.

# head wireless.h
/*
* This file define a set of standard wireless extensions
*
* Version : 20 17.2.06
*
* Authors : Jean Tourrilhes - HPL
* Copyright (c) 1997-2006 Jean Tourrilhes, All Rights Reserved.
*/#ifndef _LINUX_WIRELESS_H
# nl wireless.h | head
1 /*
2 * This file define a set of standard wireless extensions
3 *
4 * Version : 20 17.2.06
5 *
6 * Authors : Jean Tourrilhes - HPL
7 * Copyright (c) 1997-2006 Jean Tourrilhes, All Rights Reserved.
8 */9 #ifndef _LINUX_WIRELESS_H
mkfifo pipeline үүсгэдэг команд.

Гаралт:

ldd, тухайн нэг санд ямар ямар Линукс трид холбогдсон байгааг харуулдаг.

# ldd /usr/java/jre1.5.0_11/bin/java
libpthread.so.0 => /lib/tls/libpthread.so.0 (0x00bd4000)
libdl.so.2 => /lib/libdl.so.2 (0x00b87000)
libc.so.6 => /lib/tls/libc.so.6 (0x00a5a000)
/lib/ld-linux.so.2 (0x00a3c000)
col, мануал хуудсуудыг текст байдлаар хадгалах

# PAGER=cat
# man less | col -b > less.txt
xmlwf, XML баримтын бүтэц зөв эсэхийг шалгана.

# curl -s 'http://bashcurescancer.com' > bcc.html
# xmlwf bcc.html
# perl -i -pe 's@
@
@g' bcc.html
# xmlwf bcc.html
bcc.html:104:2: mismatched tag

lsof нээлттэй байгаа файлуудыг харуулдаг. Үүнээс гадна энэ командыг ашиглаад маш олон зүйлсийг мэдэж болдог. Нээлттэй порт, ажиллаж байгаа сервисүүд гэх мэт

За нэг иймэрхүү. Туршаад үзээрэй. Ялангуяа систем админуудад их хэрэг болох байх.

Ubuntu is a Microsoft product now!

2009-07-07T18:14:00.000-07:00

Ubuntu маань Microsoft -ийн бүтээгдэхүүн болчихсон тууж явнаа. Нэг ийм гарчигтай мэдээ яваад байсан ч нэг их тоохгүй яваад байсан ч сая л учрыг нь олов. Үнэндээ сая л уншлаа л даа.
Учир юундаа байсан бэ гэхээр Dell -ийн албан ёсны сайт дээр 1.6GHz Atom CPU, 8GB хатуу диск бүхий зөөврийн компьютерийн үзүүлэлт дээр Microsoft Operating System: Ubuntu 8.04 гээд тавьчихжээ. Энэ мэдээж алдаа. Гэхдээ энэ том компанийн сайт дээр ийм алдаа байх, тэгээд бүр хэдэн хоног болчихоод байхад засахгүй байгаа нь бүр ч хачирхалтай.
Dell -ийн сайт дээр яг юу бичигдсэн байгааг та бүхэн эндээс харж болно.

Нөхөр мэт дайсан минь баяртай...

2009-07-05T20:56:00.000-07:00

Түүнийг бараг ухаан орсон цагаасаа таньдаг, мэддэг болсон билээ. Хааяа хааяа уулзчихна. Харин түүнтэй уулзаж байгааг, уулзсаныг минь ээж аав мэдчихвэл хатуу үг, таван хуруу боов ганц нэгийг хүртээнэ. Гэсэн хэдий ч хүн амьтны нүднээс далдхан уулзчихдаг байлаа. Байнга уулзахгүй ээ, хааяа л нэг. Сардаа нэг ч юм уу аль эсвэл улиралд ганц.

Он цаг урссаар нэг л мэдэхэд 14 нас хүрчээ. Эрэгтэй хүүхдүүдийн хувьд юм юм л үзэж эхлэдэг нас. Чухам яг энэ үеэс л цаашдын замаа сонгодог болов уу. Гэхдээ өөрөө нэг их айхтар бодож тунгаагаад, маргааш нөгөөдрөө бодож шийдвэр гаргах нь ховор. Хувь заяа, ойр хавийн хүмүүсийн нөлөө, гэр бүлийн хүмүүжил, орчиноо дагаад зөнгөөрөө замаа сонгох нь элбэг. Би ч мөн адил энэ үеэс урьдын танилтайгаа бат нот, үй зайгүй үерхэж эхэлсэн дээ.

Найзтайгаа уулзах бүрийдээ хүний нүднээс нуугдаж, уулзсан хойноо хүртэл ул мөрөө баллах гэж эхэндээ ч ихээхэн мунгинадаг байлаа. Хуучирч орхигдсон байшин сайн нуувч, үнэртэй ус ул мөрөө баллах сайн зэмсэг болдог байлаа. Юм амархан хуучирдаг хойно доо нуувч ч барагтай бол хэрэг болохоо байж, ул мөрөө баллахдаа хойргошиж эхэлсэн дээ. Гудамж талбай, сургууль соёл, хөдөө гадаа хаа сайгүй л хамт явдаг боллоо.

Найзтайгаа уулзахын тулд өглөө эртлэн босно, орой унтахдаа хүртэл алгуур. Гэрийнхэн унтахыг хүлээж хүлээж нэг юм уулзана. Томчууд ер нь миний муу найзад их муухай хандана аа. Уулзаж байгаад баригдвал бөөн юм болно доо. Гэрийн хурлаар орно. Хэд хэдэн гэр бүл хамтарсан дээд хэмжээний уулзалтын ярианы гол сэдвийн тоонд бидний нөхөрлөл бас л дээгүүр эрэмбэтэй орно. Сургууль дээр ч мөн адил багш нар, удирдлагуудад мэдэгдвэл сахилгын шийтгэл хүртэнэ шүү дээ. Хүүхэд нас аа гэж, баригдаж шийтгүүлсэн ч надад бол хамгийн сайхан бусдад (томчуудад) бол хамгийн муухай үйлийг дахин дахин хийнэ. Түүнтэйгээ уулзах хамгийн сайхан...

Он цаг урсан өнгөрсөөр дахин нэг арваныг ардаа орхижээ. Өнөөх олиггүй найз маань миний дэргэд байсаар л. Хүүхэд ахуйгаа бодвол найзынхаа талаарх бодол маань өөр болжээ. Яаж түүнээс салах вэ, яах гэж түүнтэй анх уулзав аа, түүнтэйгээ нөхөрлөөгүй бол өдийд ямар байх байсан бол... Эдгээр мэт бодол толгойд хадаастай, бие махбодь даанч муу найзыгаа цаг тутам нэхнэ. Хүсэл, хяслан гэж ийм л байдаг байх даа. Хамт байх сайхан ч өөрийн төдийгүй, ойр хавийн хүмүүсийн эрүүл мэндэд халтай. Ер нь хүсэх нөхөр биш...

Одоо ингээд больё доо. Дахиж уулзахаа байя, харьцаагаа таслая. Өнгөн дээрээ баяр хөөр, гуниг гутрал, ядарсан ялсан бүхий л үед дэргэд минь байх үнэнч нөхөр минь байдаг ч, өрцний цаагуур намайг хорлогч атаат дайсан минь болохоор чамаас би дайжиж байна. Ухаан санаа минь чамайг энэ цаг мөчөөс мартавч, бие махбодь минь чамтай өнгөрүүлсэн арван жилийн ул мөрийг дахин нэг арван жил хадгалах биз. Ахин миний амьдралд битгий орж ир, сайн явах замд минь саад бүү хий.

Баяртай арван жил хамт байсан нөхөр минь, баяртай. Баяртай, арван жил намайг хорлосон дайсан чи баяртай...

Танай сүлжээнд Conficker байгаа юм биш биз?

2009-06-30T23:25:00.000-07:00

Conficker гэж нэг аюултай вирус /өт/ -ны талаар та бүхэн сонссон байх. Танай байгууллагын дотоод сүлжээний аль машинд энэ өт шургалсан байгаа эсэхийг яаж шалгах вэ? Энд nmap хэмээх нээлттэй эхийн сүлжээний хяналтын програм ашиглан дотоод сүлжээнд чинь conficker байгаа эсэхийг шалгах нэгэн аргыг танилцуулах гэж байна. Энэ танилцуулгад nmap –ийг Линукс машин дээр ажиллуулж байгаа болно. Хэрвээ та хүсвэл өөр ямар ч үйлдлийн систем дээр суулгаж болно. Windows дээр бол nmap –аа суулгаад комманд промпт дээрээс ажиллуулдаг юм. Гэхдээ zenmap гээд GUI -тэй хувилбар нь ч бас бий л дээ. Зарим нэг нь ашиглаж үзсэн байх гэж бодож байна.

wget http://nmap.org/dist/nmap-4.90RC1-1.i386.rpm

rpm -Uvh nmap-4.90RC1-1.i386.rpm

Нэг зүйл зөвлөхөд та nmap-ийн хамгийн сүүлийн хувилбарыг download эндээс татаж аваарай. Суулгасныхаа дарааа nmap-ийг дотоод сүлжээний муждаа ажиллуулна. Энд байгаа хамгийн сонирхолтой аргумент нь --script юм. Энэ аргумент нь NSE (Nmap scripting engine)-ийг ашиглан холбогдсон компьютерт conficker байгаа эсэхийг шалгах үүрэгтэй.

nmap -PN -T4 -p139,445 -n -v --script smb-check-vulns,smb-os-discovery --script-args safe=1 192.168.96.0/22

Шалгалт дууссаны дараагаар хэрвээ танай дотоод сүлжээнд халдварласан ямар нэг машин байвал үр дүн нь дараах байдалтай байна.

Host script results:

smb-os-discovery: Windows XP

LAN Manager: Windows 2000 LAN Manager

Name: WORKGROUP\LAME-WinXP

_ System time: 2009-06-30 10:47:12 UTC+3

smb-check-vulns:

MS08-067: CHECK DISABLED (remove 'safe=1' argument to run)

Conficker: Likely INFECTED (by Conficker.C or lower)

_ regsvc DoS: CHECK DISABLED (add '--script-args=unsafe=1' to run)

Ингээд ямар нэг сөрөг үр дүн гарсан тохиолдолд kkiller хэрэглүүрүүдийг олж аваад устгаад байж дээ. За та бүхэнд амжилт хүсье. Юу ч гэсэн дотоод сүлжээгээ нэг шалгачихад илүүдэхгүй шүү. Би ч мөн адил энэ мэдээллийг олж хараад туршиж үзэхээсээ урьтан та бүхэнд хүргэж байна. Одоо өөрийнхөө компьютерийг нэг шалгаадхая.

Цуврал 1-2. Камилле Пизарро

2009-06-30T18:57:00.000-07:00

Та бүхэнд дэлхийн урлагийн түүхэнд нэр алдраа дуурсгасан зураачдын намтар, уран бүтээлээс цувралаар хүргэж байгаа билээ. Энэ удаад Францын нэрт зураач, импрессионизмын гол төлөөлөгчдийн нэг Пизаррогийн намтрыг хүргэж байна. Энэ зураачийн намтрыг яагаад хүргэж байгааа вэ гэхээр надад дэндүү их таалагддаг болохоор нь л хүргэж байна :)).

Францын импрессионист зураач Камилле Пизарро 1830 онд баруун Энэтхэгт худалдаачны гэр бүлд мэндэлжээ. Түүний аав нь франц-еврей үндэстэн, харин ээж нь баруун энэтхэгийн эрлийз хүн байжээ. Тэрээр ажил амьдралын гараагаа аавынхаа адилаар худалдаа наймаагаар эхэлсэн ч түүний зураг зурах чин хүслэн нь амьдралыг нь өөрчилжээ. Пизарро 1852 онд Данийн зураач Ф.Мелбитэй танилцсан бөгөөд 2 жил гаран хугацаанд түүнтэй хамт Каракаст амьдарчээ. Тэрээр 1885 онд Парист ирж, Коротын байгалийн үзэсгэлэнг гайхан шагширчээ. Энэ хугацаанд Парис, түүний ойролцоох газар нутгууд түүний уран бүтээлийн гол сэдэв болоод байлаа. 1859-1861 онд Сьюззегийн академид суралцсан бөгөөд дүрслэх урлагийн томоохон төлөөлөгчид болох Моне, Сизанне нартай нөхөрлөж эхэлсэн. Бараг л энэ үеэс Жюли Веллэй хэмээх бүсгүйтэй уулзалдах болж, үүнээс хойш 10 жилийн дараа 1871 онд гэр бүл болжээ. Тэд найман хүүхэд төрүүлж өсгөнөөс хоёр хүү Лусиан Пизарро, Жорж Пизарро нар нь эцгийнхээ мэргэжлийг өвлөн авсан байна. 1861 -ээс 1863 онуудад ажилласан Салондоо гологдох болж, 1863 онд тэрээр “Salon des Refusés” үзэсгэлэнгээ гаргажээ. 1864-1868 онуудад Салонд хэд хэдэн үзэсгэлэн гаргасан ч түүний бүтээлүүд нийтийн дунд нэр хүнд олсонгүй. Хэн ч түүний бүтээлийг худалдаж авдаггүй байсан учир санхүүгийн хувьд хүнд үе эхэлсэн. 1866-1868 онуудад Пизарро Понтойз хотод ажиллаж амьдарч байлаа. Энэ үе нь түүний уран бүтээлд ихээхэн өөрчлөлтүүдийг авч ирсэн. Түүний уран бүтээлүүд нь Коротын Барбизон реализмаас Импрессионизм болон өөрчлөгдсөн. 1869/70 онд Лувсиеннес рүү шилжсэн бөгөөд яг энэ үед Франц-Пруссын дайн дэгдсэн ба түүний маш олон бүтээл устаж үгүй болжээ. Дайн намжтал тэрээр гэр бүлийн хамтаар Лондонд амьдарч байлаа. Пизаррогийн найз, зураач Добинг түүнийг уран зургийн худалдаачин, ихэвчлэн Импрессионистуудын уран бүтээлийг сурталчилдаг Дюранд-Рюүлтэй танилцуулжээ. Дюранд Пизаррогийн үзэсгэлэнг Парис (1883) болон Нью-Йорк (1886)-т зохион байгуулжээ.
1872-1878 онуудад тэрээр Понтойзод Сизаннын хамтаар амьдарч, уран бүтээлээ туурвижээ. Энэ хугацаанд түүний бие даасан импрессионист арга барил бүрэлдэн тогтжээ. Пизарро нь импрессионистуудын үндэслэгчдийн шилдэг нь байлаа. Түүнчлэн тэрээр 1874 -өөс 1886 онд Парист найман удаа бие даасан томоохон үзэсгэлэн гаргасан цорын ганц уран бүтээлч юм. 1885 онд тэрээ Сигнак болон Сиурат нартай танилцсан ба дараачийн таван жилийн хугацаанд тэдний Дивисионист/Пойнтилист арга барилд суралцжээ. Пизаррогийн социалист үзэл нь түүнд багагүй асуудал үүсгэсэн. 1894 онд анархистуудын заналхийллээс дайжин Бельги рүү дүрвэн гарсан. Гэсэн ч 1885 онд өөрөө анархист үзэлтэн болжээ. 1896 ба 1898 онуудад тэрээр Роуэны тосгон болон боомтуудын тухай хэд хэдэн зураг зурсан. Эдгээр зурагнууд нь эхэн үеийн импрессионизмын хэв маягтай бүтээлүүд байдаг. 1897-1903 онуудад ихэвчлэн Парис болон Диеппе, Ле Хаврын тухай зурагнууд түүний уран бүтээлд голлох байр эзэлж байлаа. Импрессионизмын нэрт төлөөлөгч, Францын алдарт зураач Пизарро 1903 онд насан өөд болжээ.

“Майкл Жексон” спам

2009-06-29T18:57:00.000-07:00

Өнгөрсөн долоо хоногийн хамгийн дуулиан шуугиантай мэдээл зөвхөн хөгжим сонирхогч төдийгүй хүн бүхний танил, дэлхийн сая сая хүмүүсийн шүтээн Попын хаан Майкл Жексон таалал төгссөн гэсэн гэнэтийн мэдээлэл байлаа.

Энэ үйл явдал нь муу залуусын хувьд тун олзуурхууштай явдал болжээ. Дээрх таагүй мэдээ хэвлэлээр цацагдсанаас хэдхэн цагийн дараагаар спамууд цацагдаж эхэлсэн байна.

networkworld.com –ийн мэдээлснээр уг спамын агуулгад ямар нэг хөнөөлтэй програм, идэвхтэй линк байхгүй, энгийн текст. Спаммерүүд спам хүлээн авсан хүмүүсээс хариу авах замаар цахим шуудангийн хаягууд цуглуулах зорилготой байсан гэжээ.

Харин darknet.org.uk –ийн мэдээлэлд: Уг спам нь эхэндээ цуглуулсан хаягууд руугаа энгийн текст явуулж байсан боловч сүүл рүүгээ хөнөөлтэй програм тараах болсныг бот болон арын хаалга илрүүлэгч програмуудын тусламжтайгаар илрүүлжээ. Хөнөөлтэй програмын нэр нь “Trojan.Win32.Buzus.bjyo”.
Хөнөөлтэй програм, спам тараагчдад иймэрхүү дуулиантай мэдээллүүд тун сайхан боломж олгодог байна. Майкл Жексоны өөд болсонтой холбоотой мэдээлэл бүхий захидал хаа нэгтэйгээс ирвэл унших хэрэггүй, устгаарай.

Линуксын онлайн үнэгүй сургалт санал болгогч 10 сайт

2009-06-29T18:16:00.000-07:00

Та Линуксын шинэ хэрэглэгч байсан ч хуучин, туршлагатай хэрэглэгч байсан ч асуудлууд байнга тулгарч байдаг билээ. Эдгээр асуудлуудаа шийдэхэд тань бага боловч хувь нэмэр болох болов уу гэж бодоод Линуксын үнэгүй онлайн сургалт явуулдаг сургуулиудын жагсаалтыг хүргэж байна.

1. VTC их сургууль (vtc.com)

Linux хичээлийн танилцуулга

VTC Их сургуулийн компьютер програм хангамжийн ихэнх сургалтууд нь төлбөртэй байдаг. Гэхдээ Линуксын сургалтууд нь төлбөргүй байдаг. Эхлэн суралцагчдад зориулсан видео хичээлүүд бий.

2. Novell - OpenCourseWare Project (novell.com)

Novell сургалтын төв нь өөрийн OpenCourseWare төслийн хүрээнд Линуксын онлайн сургалтын томоохон хөтөлбөрийг санал болгодог байна. Эдгээр сургалтууд нь Линуксын мэргэжлийн сертификаттай болохыг хүсэгч хэн бүхэнд тун хэрэгтэй сургалтуудын нэг ажээ. Сургалтанд хамрагдахад ямар нэг бүртгэл хэрэггүй юм байна. Түүнчлэн бүтээгдэхүүн үйлчилгээнүүдийнх нь баримт бичиг, програм хангамж зэргийг эндээс олж болохнээ.

3. IBM - LPI (Linux Professional Institute) Exam Prep (ibm.com)

IBM өөрийн вэб сайтаар дамжуулан Линуксын олон тооны гарын авлага, сургалтын материалуудыг Линуксын өндөр хэмжээний мэргэжилтэн болохыг хүсч буй хүмүүст тусламж болгох үүднээс дэлгэн тавьдаг байна. Нийтдээ 13 хичээл байдаг. Та сургалтыг материалуудыг ашиглахын тулд бүртгүүлэх хэрэгтэй. Гэхдээ мэдээж үнэгүй.

4. University of Surrey - Department of Electronic Engineering (www.ee.surrey.ac.uk)

Суррейн их сургуулийн Электроникийн инженерчлэлийн тэнхим Линукс болон Юникс үйлдлийн системийн эхлэн суралцагчдад зориулсан маш сайн гарын авлага санал болгож байна. Гарын авлага нь найман бүлэг сэдэвт хуваагдах ба хүн бүхэнд үнэгүй. Та ямар нэгэн бүртгэл энэ тэр бөглөхгүйгээр эдгээр материалуудыг ашиглах боломжтой юм байна.

5. Shuttleworth Foundation - Learn Linux Open Source Project (learnlinux.tsf.org)

“Линукс сурцгаая” нь Shuttleworth сангийн санаачилсан Нээлттэй эхийн төсөл юм. Мөн л хүн бүхэнд үнэгүй, бүртгэл энэ тэр шаарддаггүй юм байна.

6. University of California at Davis - Professor Norm Matloff's Unix and Linux Tutorial Center (ucdavis.edu)

Linux Tutorials

Калифорнийн Дэвисийн Их сургуулийн профессор Норм Матлофф Юникс болон Линуксын маш гайхамшигтай төвийг үүсгэн байгуулжээ. Бүх сэдвээр маш нарийн тодорхой бичсэн материалууд энд бий.

7. Linux Online (linux.org)

Linux Online нь бүх шатны суралцагчдад зориулсан өргөн хүрээний үнэгүй хичээлүүдийг санал болгодог байна. Түүнчлэн та эндээс “how-to”-нүүд зэрэг Линукс платформ дээр ажиллахад тань хэрэг болох олон зүйлийг олох боломжтой. Компьютерийн програмчлалын чиглэлээр сурдаг, Линуксын орчинд хэрхэн ажилладаг талаар мэдэхийг хүсч байгаа оюутнуудад тун их тус болохоор хичээлүүд байдаг юм байна.

8. About.com Linux Courses (linux.about.com)

About.com (New York Times компанийн нэг хэсэг) олон тооны онлайн хичээл түгээдэг юм байна. Хичээлүүдээ электрон шуудангаар оролцогчид руугаа өдөр бүр эсвэл долоо хоног бүр (хичээлийн агуулгаас шалтгаалан) илгээдэг аж. Түүнчлэн энэ сайтнаас өөрт хэрэгтэй олон зүйлийг олох болно.

9. Begin Linux (beginlinux.org)

Begin Linux -ын вэб сайтнаас та Линуксын үнэгүй хичээлүүдийг нь судлаж болно. Дурын хэрэглэгч ихэнх хичээлийн материалд нь шууд хандах эрхтэй. Өөрөөр хэлбэл бараг бүртгүүлэх шаардлагагүй гэсэн үг. Хичээлийн материалууд нь бичвэрээс эхлээд кино хүртэл бүхий л зүйлийг агуулсан байдаг.

10. The Linux Tutorial (linux-tutorial.info)

Систем администратор Жей Моэрийн санаачласан Linux Tutorial нь олон тооны үнэгүй Линуксын хичээлүүдийг санал болгодог байна. Энд байгаа бүх материалууд үнэгүй, ямар нэг бүртгэл шаарддаггүйгээс гадна уг сайтын форумаас өөрт тулгарсан асуудлуудынхаа хариултыг олж болох юм.

Вэб сайтаа хурдан болгоцгооё

2009-06-25T18:16:00.000-07:00

Та өөрийн хийсэн вэбийнхээ хуудаснуудыг сэтгүүлийн хуудас эргүүлэхтэй адил хурдан солигддог (ачаалагддаг) болгомоор байна уу?
Мэдээж хэн ч үүнийг хүсэх нь тодорхой. Вэб програмчлалд өргөнөөр ашиглагдаж буй PHP хэл дээр бичсэн вэбийг яаж илүү хурдан ажилладаг болгох зааврыг энэ холбоосоор орж үзээрэй.

Cisco offers Linksys 802.11n router with Linux

2009-06-23T20:00:00.001-07:00

Cisco өөрийн Linksys чиглүүлэгч /router/ -дээ нээлттэй эхийг нэвтрүүлэх эхлэлийг тавьжээ. Cisco –ийн 802.11n Wi-Fi чиглүүлэгчид Linux үйлдлийн систем суурьлуулжээ. WRT160NL чиглүүлэгч нь хэрэглэгчдэд сүлжээний төхөөрөмжийг фирмийн програм /firmware/ ашиглахгүйгээр үйлдлийн системээр дамжуулан удирдах өргөн боломж олгож байгаа юм. Түүнчлэн энэ төхөөрөмж нь техник хангамж талаасаа ч илүү уян хатан болжээ. Антеныг нь сольж болдог гэх зэрэг олон боломжуудыг нэгтгэсэн юм байна.

Мэдээж Линукс үйлдлийн системийг сонгосноор USB ашиглах, аюулгүй байдал нь ч сайжрах зэрэг олон давуу талыг олгож байгаа юм байна.

Bill Gates afraid of GNU/Linux

2009-06-23T18:38:00.000-07:00

Мэдээллийн технологи, програм хангамж үйлдвэрлэлийн салбарт томоохон байр эзлэгч Microsoft корпорацийн үүсгэн байгуулагч дэлхийн хамгийн баян хүмүүсийн нэг Билл Гейтс Линукс үйлдлийн системийн талаар ийн өгүүлжээ:

Манай үйлдлийн системийн хамгийн хүчтэй өрсөлдөгч бол Линукс. Энэхүү үйлдлийн системийн хэрэглэж сурахад хялбар, мөн зарим хэсгийг нь өөрчлөх боломжтой байдал нь Линукс хэрэглэгчдийн тоо өсөхөд гол нөлөө үзүүлж байна. Боловсролын салбарынхан, шинэ компаниуд, төрийн байгууллагууд Линукс үйлдлийн систем, нээлттэй эхийн програм хангамжуудыг сонгох болсон. Виндовс системийг Линукс системээс илүү хялбар болгохын тулд бид илүү ихийг хийх хэрэгтэй.

Билл Гейтс өөрөө Линукс үйлдлийн системийг хялбар гэдгийг хүлээн зөвшөөрч, мөн хамгийн хүчтэй өрсөлдөгч гэдгийг ч онцолжээ. Түүнчлэн:

Үйлдлийн систем бүх зүйлийг хийдэг, олон програм хангамж ажиллах боломжтой байх албагүй. Зөвхөн нэг төрлийн төхөөрөмжийг удирдах хэмжээний жижиг /эмбеддэд гэх юмуудаа/ эсвэл тусгай зориулалтын хувилбартай байх хэрэгтэй болж байна. Бид энэ тал дээр хангалтгүй ажиллаж байна.

гэсэн байна.

ModSecurity (Web application firewall)

2009-06-22T18:33:00.000-07:00

Сайн байцгаана уу? Та бүхэнд мэдээллийн аюулгүй байдал, тэр дундаа вэбийн аюулгүй байдлын талаар нэгэн бичлэг хүргэж байна.
Сүүлийн үед манай улсад төрөл бүрийн вэб сайтууд олширсоор байгаа билээ. Зарим нэг нь ганц нэг хүмүүс сонирхлоороо түр зуур ажиллуулаад хаагдаж байхад зарим нэг нь тогтмол уншигчтай болчихсон, нийтэлж байгаа мэдээлэл энэ тэр нь ч давгүй болжээ. Мэдээний, дууны, видеоны, спортын, насан хүрэгчдийн, аймшгийн гээд л мэдээнийхээ төрлөөр ангилагдана. Эдгээр сайтууд аюулгүй байдалдаа хэр анхаардаг вэ гэхээр тийм ч хангалттай бус байгаа нь ажиглагддаг. Энэ нь олон хүчин зүйлээс хамаардаг байна. Вэб хөгжүүлэгч нь туршлага багатайгаас халдлагаас хэрхэн хамгаалахаа мэддэггүй, эсвэл админ нь серверийнхээ аюулгүй байдлыг хангадаггүй, даа ялангуяа манай оронд мэдээллийн технологи залуу байгаа нь ч гэсэн нөлөөлдөг гэж би хувьдаа боддог. Хэдэн жилийн дараа бол шал өөр болно гэдэгт ч итгэдэг.
За за, олон юм нуршаад яахав гол юмаа бичье. Вэб програмын галт хана ModSecurity. Энэ нь нээлттэй эхийн, үнэгүй галт хана юм. Би хувьдаа Apache сервер дээр туршиж үзэж байсан. Вэб серверийн лог илүү дэлгэрэнгүй гарна. Get болон Post -оор авч байгаа бүх параметрын утгууд хадгалагдана. Тэхээр янз бүрийн дайралтуудыг илрүүлэх боломжтой. За тэгээд лог анализ хийдэг, аятайхан интерфэйстэй програм (Ossec, Php-syslog-ng гэх мэт) -тэй бол халдлагыг цаг тухайд нь илрүүлээд, хамгаалаад, хариу үйлдэл хийгээд байж болно. Ингээд ModSecurity -ийн танилцуулгыг хүргэж байна. Вэбийн админууд байвал туршаад үзээрэй. Яаж суулгах, яаж ашиглахаа интернэтээс хайгаад олчино биз ээ. Бүр болохгүй бол сэтгэгдэл үлдээгээрэй, зааврыг нь бичье.

Firefox ашиглан флаш видео татах

2009-06-18T18:20:00.000-07:00

Та бүхэнд Линукс үйлдлийн системд ямар нэгэн нэмэлт програм, хөтчийн add-on ашиглахгүйгээр youtube, viddler, blip.tv –ийн видеонуудыг татах хамгийн энгийн аргыг тольлуулж байна.
Олон хүн энэ аргыг мэддэг байж магагдгүй л юм. Гэхдээ мэддэггүй нэгэнд нь тус болно биз ээ.

1) Татах гэж буй видео бүхий хуудсаа хөтөч дээрээ нээнэ.

2) Видеог бүрэн кейшлэж дуусах хүртэл хүлээн.

3) Вэб хуудас ажиллаж байх хооронд цонх болон табыг хаахгүйгээр, /tmp хавтас руу орно.

4)Эндээс та татах гэж буй видеогоо хайж олох хэрэгтэй. Видео файл нь ямар нэг өргөтгөлгүй харин“Flash” гэсэн эхлэлтэй, сүүл хэсэгтэй хеш код агуулсан нэртэй байна. Жишээ нь: “FlashGjqRPZ”

5) Видео файлаа өөр байрлал руу хуулаад хэрвээ хүсвэл тохирох өргөтгөлтэйгээр нэрийг нь солиорой. Жишээ нь .flv .mp4 гэх мэт.

6) Одоо та хөтчөө хааж болно.

7) Зиа одоо татаж авсан видеогоо тоглуулаад үзээрэй.

Энэ арга нь төгс арга мэдээж биш юм:

Флаш видео бүхий бүх вэб дээр ажиллахгүй.
Олон файл татах боломжгүй.
Кейшлэх явц тасарвал дахин үргэлжлүүлэх боломжгүй.

Энд програм ашиглан татах бас нэг энгийн аргыг хүргэж байна.

1. apt-get install clive

2. Терминалаа нээнэ

3. Видеогоо хадгалах гэж хавтас руугаа орно.

4. clive URL_tanii_tatax_videotoi_site

5. Ингээд л болоо J

Linux games

2009-06-17T23:54:00.001-07:00

Линукс руу урвахад саад болдог гол хүчин зүйлүүдийн нэг нь тоглоом гэж ярих хүмүүс цөөнгүй байдаг. Нэг талаараа тийм ч юм шиг, нөгөө талаараа линуксаа өмөөрмөөр ч юм шиг. Яахав тоглоом тоглодог хүмүүст бол мэдээж энэ үзүүлэлт нь Линуксын рейтингийг унагана л даа. Гэхдээ бас оргүй хоосон ч бас биш юм. CS -тэй төстэй Urban Terror гэдэг ч юм уу хэд хэдэн тоглоом тоглож үзэж байсан юм байна. Та бүхэн өөрийн сонирхсон тоглоомоо суулгаад тоглоод үзээрэй. Нэг линк хүргэж байна.